LEGAZPI CITY-Duwang obrero an nasalbar na buhay sa sarong hydropower tunnel sa Nepal, siyam na aldaw makalihis na sinda ma-trap kasunod kan mahiwasang pagbaha asin pagrasay kan daga sa lugar.
An mga nakaligtas nabisto, iyo sinda Sanjay Sah, sarong mechanical foreman, asin Kabir Maharjan, sarong mechanical supervisor. Parehong nakua an duwa sa tunnel kan Upper Trishuli 3A Hydropower Station sa distrito nin Rasuwa kan aldaw nin Biyernes, Setyembre 4.
Sinabi kan mga awtoridad na an rescue teams an nakadangog nin mga boses hale sa laog kan tunnel bago nakua an duwang indibidwal, kun sain tulos sindang pig-pull out sa nasabing tunnel.
An pagsalbar sa duwang indibidwal nagtao nin panibagong paglaom sa pamilya kan iba pang indibidwal na nawawara.
Pigkakarkulo na maabot sa 900 na mga trabahador an posibleng na-trap sa mga tunnel kan manlaen-laen na hydropower projects sa kahalabaan kan Trishuli River makalihis an kalamidad kan Agosto 26.
An mga search and rescue operations nagpapadagos mantang an mga awtoridad naghihingoang maabot an ibang mga tunel na napano nin laboy, gapo, asin iba pang debris.
An kalamidad kawsa kan matinding pagbabaha na sinundan kan landslide kan mga glacier, gapo asin laboy sa lugar, kun sain rinibong katawo an nagadan asin nawawara.
