LEGAZPI CITY—Kalaboso an duwang persona makalihis na madakop na may darang pigdududahang hinabonan na ari-arian sa ciudad kan Legazpi.
Segun ki Legazpi City Police Station Acting Chief of Police Police Lieutenant Colonel Domingo B. Tapel Jr., sa intrevista kan Bombo Radyo Legazpi, binisto an mga suspek na sinda alyas “Bon”, 21-anyos asin alyas “Bert” na parehong residente kan Barangay Rawis, Legazpi City.
Paliwanag kan opisyal na napansin asin nagduda an saindang kapulisan durante kan saindang pagpatrolya sa ciudad na may bitbit na TV, gasul, asin iba pang personal na gamit an duwang persona.
Mantang suboot pig-intrevista kan mga pulis an duwang suspek mapadapit sa mga nasabing gamit an napansin an inconsistency kan saindang mga salaysay.
Huli digdi bineripikar kan kapulisan an impormasyon sa paagi kan pagpasiring sa opisina kan nasabing barangay, alagad, digdi na man nagpasiring an babaeng biktima nganing i-report na nahabunan siya nin kagamitan.
Positibo kaining binisto na saiya an mga nasabing gamit na kinuwa kan mga suspek na nawawara sa saiyang residencia.
Tulos na naarestar an duwang persona asin idinara sa Legazpi City Police Station asin mahahampang sa kasong pagbalgar sa Presidential Decree No. 1612 o Anti-Fencing Law.
