LEGAZPI CITY— Nagpalyar an sarong parahabon na makua an wallet kan sarong retiradong miyembro kan Philippine Constabulary makalihis ining madakop kan mismong biktima.
Nangyari an insidente sa Rosero St., Barangay Centro, syudad kan Masbate durante kan Rodeo Grand Parade.
Maogmang naghihiling kan nasambitan na parada an biktimang si Felipe Martinez, 90-anyos kan Barangay Ibingay sa parehong syudad kan sagin-sagin na banggaon kan mga suspek na binistong sinda Leo Noel Briones, 30-anyos kan Barangay San Roque, Legazpi City asin Wilson Pesada, 40-anyos kan Barangay Bitano.
Namatean kan senior citizen na biktima an kamot ni Pesada sa saiyang bulsa mientras na pigkukua kaini an saiyang pitaka kun kaya tulos man na kinapotan ni Martinez an kamot kaini asin nagkurahaw nin tabang.
Naalerto an mga reservist kan 506th Philippine Army na sinda Romeo Andaya asin Marcelo Malinig na tulos na inarestar an mga suspek kun sain narekober an hinabon na pitakang may laog na ID asin P1,000.
Dinara an mga ini sa istasyon kan pulisya asin duman na sinangatan nin reklamo.
