Inireport kan Department of Social Welfare and Development na maabot na sa labi 2.9-milyong indigent senior citizens sa Pilipinas an naabutan ninda nin social pension.
Ini an para sa ikaduwang quarter kan presenteng taon.
Segun ki DSWD Protective Services Bureau Director Edmond Monteverde, maabot sa 2.2 milyong senior citizens an nakakua nin tig-P3,000 sa enot na parte kan 2025.
Suminakat man sa kabilogang 751,022 an nakaresibi nin tig P6,000 para sa enot asin ikaduwang quarter.
An social pension para sa indigent seniors sa nacion an alinsunod sa Republic Act 11916 kun saen ihinalangkaw na ini sa P1,000 kada bulan puon kan enot na bulan kan nakaaging taon.
Padagos man na pigsisikap kan ahensya na maiayon sa tamang panahon an social pension para sa mga senior sa paagi kan pakikipagtabangan sa mga lokal na gobierno.
