LEGAZPI CITY—Pigsierto kan Department of Social Welfare and Development (DSWD) Bicol na padagos sindang mataong asistensya sa mga biktima kan mahewasan na kasulo sa banwaan kan Pilar, Sorsogon sagkod na sinda makarekober.
Magigiromdoman na maabot sa 300 na pamilya an naapektaran kan nangyaring kasulo sa Brgy. Banuyo kan nasambit na banwaan kun saen natumpos nin kalayo an saindang mga kaharongan.
Segun ki DSWD Bicol Disaster Response Management Division Information Officer Carl James Cabarles, sa intrevista kan Bombo Radyo Legazpi, na padagos sindang mataong asistensya sa mga biktima sagkod na an mga ini makarekober huli ta iyo ini an direktiba kan mga haralangkaw na opisyal kan ahensya.
Naenot nang nagbarewas an DSWD Bicol nin food packs, non-food items, hygiene kits, family kits asin sleeping kits sa mga apektadong pamilya.
Nagkundusir man an ahensya nin psychosocial intervention para sa mga kaakian.
Dugang digdi nagbarewas man an ahensya nin cash relief assistance sa irarom kan Assistance to Individuals in Crisis Situations o AICS na may kantidad na P10,000 sa kada pamilya.
Padagos man an pigsasagibong assessment sa mga naapektarang pamilya ngani na matawan ini nin livelihood assistance kan saindang ahensya.
Mientrastanto, sinabi man kaini sa mga biktima kan kasulo na ipaaram sa saindang ahensya en kaso man na sinda may kaipuhan.
