LEGAZPI CITY – Padagos na pighahanap kan mga otoridad an suspek sa nangyaring robbery hold up sa sarong estudyante sa portyon kan Vel Amor Subdivision.
Nabisto an biktima na si May Triñanes, 20-anyos asin residente kan Barangay 18, Cabangan Legazpi City.
Segun sa impormasyon, pauli na an biktima sa saindang harong kan bigla ining ranihan kan suspek na nabistong si Bernel Barcelon y Delmundo na napag-araman na sarong drug surrenderee asin tinutukan ini nin patarom.
Nakua sa biktima an sarong laptop na nagkakantidad nin maabot sa P20,000, cellphone na nagkakantidad nin P21,000, asin wallet na laog an saiyang mga ID asin ATM card.
Napag-araman na antes na nagdulag an suspek, sinuntok pa kaini an biktima sa saiyang pandok asin tulak.
Segun ki PSupt. Nilo Berdin, hepe kan Legazpi CPS, naaydentipikaran ninda an suspetsado sa tabang na man kan sarong testigo asin positibo man ining binisto kan biktma.
Sa presente pig-aaram kan mga mga otoridad kun sain dinara ni Barcelon an mga gamit na hinabon kaini asin nasa proseso na man nin pagsasangat nin kaso konta digdi.
Labi man an pagkadagit ni Berdin huli ta pigsasayang suboot kan mga ini an tsansa na ipigtatao sa sainda kan gobyerno kun sain nagpatanid ini na may kabubugtakan an mga ini oras na manlaban sa mga otoridad.
