LEGAZPI CITY – Naglalaom an pulisya sa banwaan kan Polangui, Albay na dakulang kawaran sa ipigbabagsak na suplay kan iligal na droga an pagkagadan kan target kan buy-bust operation sa Brgy Napo.
Pigsasabing nanlaban asin nagbalong magpaputok nin badil si Ronald Viterbo alyas Ronnie, kaya nauli sa shootout an insidente.
Ipighayag ni PMaj. Ed Azotea, hepe kan Polangui PNP sa ekslusibong intrevista kan Bombo Radyo Legazpi, padificilan man suboot an nagin operasyon urog na palipat-lipat nin apartment an suspek.
Bako man suboot propiong taga-Polangui si Viterbo asin taga-Brgy. Tinago sa ciudad kan Ligao mantang ipigkokonsiderar man na ikasiyam sa Provincial Drug Watchlist kan Albay.
Segun pa sa hepe, nagpapabisto man ining Bro. Rhon Ante na saro suboot na pastor alagad nabuyagyagan sana an totoong pagkakabisto kan makumpara kan Ligao City PNP asin pulisya kan Polangui an pandok asin rekord kaini sa rogues’ gallery.
Sa Metro Manila pa suboot hali an ipigsusuplay kaini partikular na sa university belt sa banwaan
Dae man maibitaran na magduda kan mga pagtaraid na harong kan target urog na sa luwas-laog na mga estudyante asin mga dae bistong tawo sa lugar.
Napag-araman na kan nakaaging semana pa ikinasa ang buy-bust kontra digdi alagad naatrasado huli sa makusog na pag-uran.
Sa presente, dinara naman sa PNP Crime Laboratory Office an ginamit kaining caliber .38 na badil para sa magkakanigong disposisyon.
