Pigsyerto kan Department of Justice na an mga piniling ‘state witnesses’ sa kaso kan flood control papaninimbagon kun enkaso bawion ninda an saindang testimonya manungod sa kontrobersiya.
Segun ki Justice Secretary Fredderick A. Vida, mahahampang sinda nin kaso enkaso madagos an orolay o magkaigwa nin ‘recantation’.
Sinabi niya na an siring na lakdang sarong pagbalgar sa mga kondisyon na inilatag asin pinagkasunduan kan mga ‘state witnesses’ sa irarom kan Witness Protection Program.
Sa ibong kan orolay na igwa nin ‘recantation’, piglinaw kan kalihim na wara pa nin kumpirmasyon sa presente dapit digdi.
Alagad, naglalaom si Justice Sec. Vida na an mga piniling ‘state witnesses’ sa flood control an magpapadagos asin matindog sa korte sa oras na pormal nang maisangat an kaso.
Mientrastanto, sa oras man na mangyari an ‘recantation’, nanindugan an Department of Justice na wara nang bawian kan kwartang naiuli gikan sa anomaliya.
Nanindugan si Justice Sec. Vida na matenir sa gobyerno an milyones na ‘restitution money’ na gikan asin boluntaryong ibinalik kan mga testigo sa flood control.
Kung magigirumduman, base sa informasyon hale sa departamento, uminabot na sa labi sa 300-M Pesos an kabilugang kantidad kan ‘restitution money’ na nakolekta asin naturn-over hale sa mga anomaliyang proyekto.
Mientrastanto, kumpiyansa man an Department of Justice sa mga assigned state witness huli ta nakikipagtabangan ini sa sainda sa pagdevelop kan mga kaso na isasangat.
