LEGAZPI CITY-Ipinaluwas na kan Department of Health (DOH) an listahan kan mga ospital na magseserbing pangenot na healthcare facilities enkaso tumama an suboot magnitude 7.2 o an pigaapod na “The Big One” sa Metro Manila.
Segun kay Health Secretary Teodoro Herbosa, nasa apat na quadrants an kadaklan sa Maynila ngani matukoy an mga pangenot na ospital an matugon sa oras na tumama an nasabing makusog na linog.
Sa North Quadrant kaiba an mga nagkapirang ospital Caloocan, Quezon City, Valenzuela, San Juan, asin Mandaluyong.
Sa East Quadrant kaiba an Marikina, Pasig, Mandaluyong, parte kan Quezon City asin itinalaga man an Amang Rodriguez asin Rizal Medical Center.
Mantang sa West Quadrant kaiba an mga ospital sa Manila, Malabon, asin Navotas.
Sa South Quadrant kaiba an mga ospital sa Las Piñas, Makati, Muntinlupa, Parañaque, Taguig, Pateros, asin sa Pasay.
Magpapaotob man suboot nin 10% surge capacity an mga DOH hospital ngani madugangan an mga kagamitan sa ospital.
Magtatao man nin tabang an mga ospital hale sa Region 3 asin Region 4A, mga lokal asin iba pang pribadong ospital sa Metro Manila sa oras na tumama an suboot mapaminsalang linog sa nacion.
Mientrastanto, ipinahayag man kan Department of Health an pasado sa Hospital Safety Index an mga imprastraktura kan saindang mga ospital asin nakahanda na an mga emergency contingency plan para sa posibleng mga sakuna.