LEGAZPI CITY- Nagpagirumdom an mga otoridad sa publiko na ibitaran an paggamit nin paputok ngani na salbado an magin selebrasyon kan Pasko asin Bagong Taon.
Sa presente kaya, naka alerto na an Department of Health Bicol asin iba pang mga ahensya nin gobierno sa pagbabantay sa posibleng mga firecracker related injuries.
Segun ki DOH Bicol Violence and Injury Prevention Program Regional Program Manager Julie Ann Legazpi-Granadino na mayorya sa mga aksidente na may kinaaraman sa paputok an nangyayari tuyong Disyembre 31 hasta Enero 1 kun sain pigsasabat an bagong taon.
Basado sa datos kan nakalihis na taon, nakapagrehistro nin nasa 49 firecracker related injuries sa rehiyong Bicol na nasa 24% na paglangkaw kumparar kan taong 2023.
Pinakadakol digdi an hali sa Camarines Sur na kumpwesto nin 31% kan nasabing datos na pigsusunda kan Albay asin Camarines Norte.
Napag-araman na dakol na mga pasyente an nakapagrehistro nin injuries sa kamot, mata, pandok asin payo.
Ngunyan na taon, duwang sentinel sites an igwa sa rehiyon kaibanan na an Bicol Medical Center asin Bicol Regional Hospital and Medical Center.
