LEGAZPI CITY- Pigpapalikay kan mga health experts an publiko sa posibleng epekto kan mpox virus.
Segun ki Department of Health Bicol Center for Health Development Regional Epidemiology and Surveillance Unit head Dr. Aurora Teresa Daluro na an mpox an sarong health emergency alagad bako pandemya.
Paliwanag kan opisyal na nagkaigwa nin pagbabago sa mga nairehistrong kaso kan 2022 kumparar sa ngunyan.
Kaibanan sa mga sintomas an kalintura, pangungulog nin payo asin kasu-kasuan, back pain, pangluluya, asin kulani.
Pwedesir man na maipasa an mpox sa paagi kan skin to skin, mouth to mouth asin mouth to skin.
Sa ibong kaini, nilinaw man kan opisyal na pinag-aadalan pa kun pirang aldaw an kinakaipuhan ngani na maipasa an helang hali sa mga ginamit na kagamitan kan pasyente na nagpositibo sa mpox.
Katakod kaini, nagpagirumdom si Dr. Daluro na importante an pag-sanitize asin paghuhugas nin kamot.
Mantang nagpaparahay, importante man suboot na ma-isolate an sarong pasyente ngani na maibitaran na makaolakit kan helang.
