LEGAZPI CITY – Ipadagos an pagsiservicio asin pagsusuplay nin kuryente sa banwaan kan Rapu-Rapu, Albay, an panibagong direktiba kan Department of Energy na naka-address sa National Power Corporation (NAPOCOR), National Electrification Administration (NEA) asin Albay Power and Energy Corporation (APEC).
Susog sa panibagong direktiba na may petsang Mayo 21, nagtagama nin 60 dias o duwang bulan an mga nasabing oficina sa promesang mabayadan nin bilog an P32 million na kautangan kan isla.
Sa intrevista kan Bombo Radyo Legazpi ki APEC spokesperson Patria Gutierrez, mismong an national government na an nag-takeover sa problema asin bahala na suboot an lokal na gobierno asin an mga nasabing ahensya kun papano an gigibuhong procedemiento sa pagbayad.
Naglalaom si Gutierrez na magin pamukaw na an nangyari ngani na magimata an mga residenteng may moroso na magbayad kan pagkakautang.
Nakapalaman pa sa nasabing surat na kaipuhan man na pakusugon kan APEC an collection drive sa banwaan para mabayadan an generation expenses sa NAPOCOR.
Enot nang nagpaotob kan power shutdown sa nasabing banwaan kan Mayo 15, makalihis na dai makapag-settle kan 50% o P15 million na bayad sa utang.
Mientras tanto, sa suway na intrevista ki Rapu-Rapu Mayor Ronald Galicia, pag-oolayan pa an masunod na lakdang dapit sa pagbayad.
Importante sanang masabutan kan mga residente na kaipuhan na magbayad para dai dagos na mapugulan.
