LEGAZPI CITY-Pigsierto ni Department of the Interior and Local Government (DILG) Secretary Jonvic Remulla na warang special treatment kay dating Senator Ramon “Bong” Revilla Jr.
Ipigbuyagyag kan kalihim na personal siyang inapodan ni Revilla makalihis an inisyung manhamiento de aresto laban sa saiya.
Segun pa kay Sec. Remulla, sinabihan suboot niya an dating Senador na mas marhay kun magsuko ini sa mga otoridad.
Idinetalye ni Remulla na kapareho kan iba pang detainee, tulos na nagsairarom sa standard booking asin custodial procedures an dating Senador asin binasahan kan saiyang mga direchos pagabot sa Crame.
Nagagi man suboot an dating mambabatas sa bilog na proseso na kinakaipuhan para sa boluntaryong pagsuko.
Bilang parte kan proseso, kinaipuhan na isuko ni Revilla an saiyang 20 lisensiyadong baril.
Bago an pagsuko, nagpahayag nin pagkamundo si Revilla huli sa kawaran nin due process na nagresulta sa pag-isyu kan arrest warrant asin hold departure order laban sa saiya.
Mientrastanto, ikinaogma man niya an piyansang P90,000 sa kasong graft na may kinaaraman sa P92.8 million ghost flood control project sa Pandi, Bulacan.
Sa presente nakadetene si Revilla sa New Quezon City Jail sa Payatas, basado sa commitment order na ipinaluwas Sandiganbayan Third Division.
