LEGAZPI CITY – Nakapagtala an Department of Education (DepEd) Bicol nin labing pagbaba sa bilang kan mga insidente nin bullying sa mga eskwelahan sa rehiyon poon kan 2023.
Segun ki DepEd Bicol Project Development Officer IV Maria Cristina Baroso sa intrevista kan Bombo Radyo Legazpi na nagbaba suboot an mga report mapadapit sa bullying incident poon kan 2022 na igwang 618 asin 24 na sana kan 2023.
Pigdugang pa kaini na pigpapakusog ninda an pag implementar kan localized anti bullying policy asin code of conduct sa mga eskwelahan sa rehiyon asin sa bilog na pilipinas.
Dae lang nakatutok an saindang programa sa mga na-bully kundi nakatutok man sa mga nambubully sa paagi man kan pagsairarom sa counseling kan mga ini.
Pigtawan doon ni Baroso na nagkondusir sinda nin pag-aadal manungod sa kaaraman kan mga joven sa saindang karapatan sa eskwelahan asin napag-araman na saro an bullying sa numero unong pigpoproblema kan mga estudyante sa rehiyon.
Kaipuhan suboot nin capacity enhancement sa mga guidance designate sa mga eskwelahan nganing makapagtao nin counseling sa mga estudyante.
Dapat man na irespeto an buhay kan mga estudyante asin kan saindang mga kapwa nin huli ta may mga polisiya na nakapairarom sa mga ini.
Dae man dapat suboot mawara an tamang pagdisiplina kan mga magurang sa saindang aki urog na kun sadit pa sana ini nganing dae ninda ini magibo mantang nagdadakula sinda.
Pangapodan kan opisyal sa mga estudyante na dae na maggibo nin mga bagay na makakakulog sa kaklase nin huli ta magkakaigwa iyan nin epekto sa sainda kundi magtarabangan na sana nganing mapakaray an kamugtakan kan saindang kapwa.
