LEGAZPI CITY — Inasegurar kan Department of Education (DepEd) an pagbabantay kan seguridad kan labi sa 30, 000 volunteer teachers sa Bicol na magsisirbeng board of election tellers (BETs) sa paparaning pirilian sa Mayo 14.
Sa intrevista kan Bombo Radyo Legazpi ki DepEd Bicol spokesperson May Jumamil, nasa 37,000 paratukdo an piglalaomang kokompleto sa BETs sa rehiyon.
Katakod kaini, nagkrear na man kan Election Task Force (ETF) an ahensya sa kada division office na obhetong mapangatamanan an seguridad kan mga nasabing paratukdo sa peryodo kan pirilian na pambarangay asin Sangguniang Kabataan.
Naaraman man kan DepEd an “risky situation” na kakamugtakan kan mga urog na enot naman na inihayag kan pulisya na Bicol an igwang pinakahalangkaw na numero kan election watchlisted areas sa bilog na Pilipinas.
Magigirumduman na susog man sa ipigluwas na validated list kan Commission on Elections (COMELEC), nagbadol na sa 1, 136 na barangay an ipigsairarom sa areas of concern, areas of immediate concern asin areas of grave concern sa Kabikolan.
