LEGAZPI CITY – Nagsakat na sa labi 1.23 million an kabilugang numero kan mga nakapag-enrol nang estudyante sa Bicol.
Sa pigluwas na datos kan Department of Education (DepEd) Regional Office 5 hasta alas-8:00 kasubagong aga, Agosto 10, nasa 1, 234, 600 na an total enrollees sa mga pampubliko asin pribadong eskwelahan sa rehiyon.
Pinakahalangkaw na enrollees sa Camarines Sur sa labi 311, 000 na pigsusundan kan Albay asin Masbate.
Sigon ki DepEd Bicol information officer Mayflor Jumamil sa intrevista kan Bombo Radyo Legazpi, indikasyon an nasabing numero kan paglangkaw kan mga nagmamawot na maka-enroll sa papalaog na School Year.
Pakiolay sanang dae na paghalaton an deadline sa Agosto 22 antes na magpa-enrol.
Afuera sa enrollment, nakakonsentrar man an ahensya ngunyan sa Brigada Eskwela asin Brigada Pagbasa na piglalaomang makakasimbag sa nagkapira pang pangangaipo sa laog kan Learning Recovery Plan.
Magsisirbe ining intervention sa mga estudyanteng nadidificilan sa pagbasa alagad bako rekisito sa pagklase kan learners.
Mientras tanto sa pagbubukas kan school year, tatawanang-konsentrasyon muna an reading, literacy asin numeracy.
Huli man sa bulos kan mga nagbabakal nin school supplies para sa pagbubukas kan klase, nakikipagkoordinar na sa Department of Trade and Industry (DTI) para sa pagmonitor kan mga presyo.
