LEGAZPI CITY-Plano kan defense team ni dating Presidente Rodrigo Duterte na mag-apela giraray nin pansamantalang kalayaan kan dating Presidente.
Ini makalihis na ibasura kan International Criminal Court (ICC) Appeals Chamber sa paagi kan unanimous decision an kamawotan kan kampo na pansamantalang paglaya kan dating Presidente kansuudma.
Segun sa lead counsel ni Duterte na si Nicholas Kaufman, pighahalat pa ninda ngonian an resulta kan medical evaluation ni Duterte na nakatalaan na iluwas sa Disyembre.
An medical evaluation iyo an ma-assess kan pisikal asin cognitive condition kan dating Presidente.
Sinabi man ni Kaufman na an desisyon kan Appeals Chamber an dai piglalaoman asin dai nanggad nagsuportar sa pansamantalang pagpaluwas nin sarong indibidwal na kinasuhan nin crimes against humanity.
An depensa nagmantinir na an 80-anyos na dating Presidente dai na pigkokonsiderar na “flight risk” asin dai na nagtatao nin banta sa mga testigo huli sa saiyang nagluluyang salud.
Dugang pa ni Kaufman, an resulta kan medical evaluation magigin parte kan saindang bagong mosyon para sa saro pang interim release.
Tinawan duon man kan depensa na ipapadagos ninda an saindang paghihingoa na masierto an pagpaluwas kan dating Presidente sa ibong kan mga nakaaging pagnegar sa nasabing kahagadan.
