LEGAZPI CITY-Magtetenir si dating Senador Ramon “Bong” Revilla Jr. sa sarong selda sa Payatas, Quezon City na may hiwas na 47-square-meter asin kapasidad para sa sampulong katawo segun kay Bureau of Jail Management and Penology (BJMP) spokesperson Jail Superintendent Jayrex Bustinera.
Ini mantang nagsasairarom an dating Senador sa pitong aldaw na medical quarantine, na sarong importanteng protocol kan BJMP para sa mga bagong preso ngani maibitaran an pagkalat nin mga hela sa laog kan kulungan.
An temporamenteng pagtetenir ni Revilla sa Quezon City jail kasunod kan commitment order hale sa Sandiganbayan para sa saiyang pagkakakulong sa kasong malversation na may kinaaraman sa ghost infrastructure project sa Bulacan.
Segun kay Jail Superintendent Bustinera, may mga kaiba sa selda si Revilla mantang nagsasairarom sa quarantine period kabale an mga kapareho niya akusado na si dating DPWH Bulacan Assistant District Engineer Brice Hernandez, Jaypee Mendoza, Arjay Domasig asin Juanito Mendoza.
Makalihis an nasabing proseso, saka suboot ihahalo si Revilla asin iba pa sa general population kan Quezon City jail na igwang 3,600 persons deprived of liberty (PDLs).
Piglinaw man kan Superintendent na dai niya tatawanan nin espesyal na pribilehiyo si Revilla asin susunudon an mga regualsyon siring kan pagbabawal sa paggamit nin cellphone, allowance na P100 kada aldaw para sa pagkakan asin an itinakdang oras kan pagbisita.
Wara man suboot na aircon an kada selda asin igwang duwang bentilador sana.
Tinawan man si Revilla nin yellow na BJMP t-shirt siring kan mga iba pang preso.
Mientrastanto, nasa pitong DPWH officials na an nakakulong sa nasabing pasilidad poon Nobyembre 2025 huli sa maanomaliyang flood control project sa Oriental Mindoro.
