LEGAZPI CITY — Dae pa maaraman an motibo sa likod kan pambabadil sa dating miyembro kan Philippine Army asin kaiba kaini sa Barangay Talabaan, banwaan kan Aroroy sa Masbate.
Sa ipinaabot na impormasyon sa Bombo Radyo, lunad kan saiyang motorsiklo an suldadong si Genie Velasco, residente kan Barangay Ambolong asin backride kaini na si Daniel Corpuz na tubong Barangay Talabaan kan nasabing banwaan kan biglang ulangan kan riding in tandem asin pagbabadilon.
Dead on the spot an suldado mantang pigsasairarom pa sa medical treatment an kaiba kaini.
Tulos man na nagdulag an dae pa nabibistong mga suspek pasiring sa Barangay Bangon kan parehong banwaan makalihis an pambabadil.
Sa ngunyan, nagpapadagos pa an pigsasagibong operasyon kan Aroroy Municipal Police ngane mabisto an nasa likod kan krimen.
