LEGAZPI CITY – Nakapagbarewas na nin mga magkakanigong tabang an Lokal na Gobierno kan Daraga, Albay sa saindang mga residenteng apektado kan pag-aalburuto kan Bulkang Mayon.
Segun ki Daraga Public Information Officer Renz Luna sa intrevista kan Bombo Radyo Legazpi na nakapag-distribwer na sinda nin N95 facemask sa mga barangay na harani sa pamitisan kan Bulkan kasunod kan namateang minimal ashfall.
Sa ibong kan warang Barangay sa nauambitang banwaan an nasa laog kan 6KM permanent danger zone, padagos man nindang pigbabantayan an mga lugar na nakapalaog sa 7KM hasta 8KM extended danger zone.
Dae man ninda pighahale na magkaigwa nin mga evacuees sa mga masunod na aldaw urog na kun maglala an sitwasyon kan Bulkan asin magsakat sa alert level 4.
Pigtaram pa kan opisyal na afuera sa pagtaong tabang sa mga residentes an nag-alokar man sinda nin pondo para sa mga ekipahe na piggagamit kan mga otoridad sa pagbabantay sa mga border arug na sana kan personahes kan Daraga Municipal Police Station asin Municipal Disaster Risk Reduction and Management Office.
May ipigdesignar man sindang lugar nganing magserbing evacuation site kan mga paraooma sa saindang mga atamang hayop nganing dae na magbalik-balik an mga paraooma sa paglaog sa mga ipigdeklarang danger zone.
Nagtao na man nin promesa an Municipal Agriculture Services Office na tatabangan an mga residente nindang paraooma na tatabangan sinda ngonian na paralisado an saindang hanapbuhay huli sa pag-aalburuto kan Bulkan.
Pagdoon pa ni Luna na nakabantay na sinda sa Miisi Gully na saro sa mga dominanteng pig-aagihan kan Lava flow kan Bulkan ngonian na padagos an pyroclastic density currents na nairerehistro nganing ma-ebakwar an mga residentes enkaso maglala pa an sitwasyon kan Mayon.
