LEGAZPI CITY – Dead on arrival ang dalawang motorista matapos ang aksidente ngayong umaga sa Purok 2, San Francisco, sa bayan ng Malilipot, Albay.
Sa panayam ng Bombo Radyo Legazpi kay PCpt. Alex Alcantara, ang hepe ng Malilipot Municipal Police Station, binabagtas ng isang bus ang daan mula sa direksyon ng lungsod ng Legazpi papuntang Tabaco City nang may isang hindi na pinangalanan na pedestrian ang tumawid sa kalsada at mismong pinangyarihan nitong madugong insidente.
Ayon kay Alcantara, sinubukan umanong umiwas ng naturang bus driver sa papatawid na pedestrian nang hindi namalayan ang paparating na dalawang motorsiklo na ang isa ay mayroong lulan na pasahero.
Dagdag pa nito, pumailalim pa umano ang isang motorsiklo at drayber nito sa minamanehong bus ng naturang driver.
Nabatid na dalawa sa mga biktima nito ay pawang mga estudyante.
Sa kasalukuyan ay nilalapatan na ng atensiyong medikal matapos isugod sa isang pagamutan ang dalawang biktima dulot ng tinamong sugat sa iba’t ibang bahagi ng katawan.
Samantala, nagpapatuloy naman sa ngayon ang masusing imbestigasyon ng kapulisan habang nasa kustodiya na ng Malilipot MPS ang tsuper ng naturang bus.
