Nangangapudan an Department of Agriculture Bicol sa mga lokal na gobyerno kan rehiyon na makipagtabangan sa pagcontrol kan African Swine Fever.
Segun kay Lovella Guarin, an Spokesperson kan Department of Agriculture Bicol sa intrevista kan Bombo radyo Legazpi nagdadakol na ngunian an kaso kan ASF sa rehiyon kun saen sa tulong Probinsya kan Bicol, igwang nasa 12 banwaan an may active cases apwera sa dating red zone na may aktibong kaso kan nasabing helang.
Segun pa sa opisyal na nailipat na an ASF control and prevention sa Local government Unit sa paagi kan local government code of 1991.
Pigduon kaini na sulamenteng an saindang piggigibo an testing asin laboratory kan mga orig asin matao man sinda nin giya sa LGU kun kaipuhan nin tabang.
Importante suboot na higotan an mga boarder control asin magkaag nin mga checkpoint sa mga kada banwaan ngane na malikayan an padagos na paglobo kan ASF.
Dugang pa kan opisyal na kaipuhan magsumitir nin mga dokomentos an mga lokal na gobyerno sa saindang opisina para sa pag upgrade kan saindang mga kategorya.
Mientrastanto, nangapudan man an opisyal sa mga hograisers na makipagtangan man sainda huli ta igwa man sindang pigtataong pinansyal na asistensya kun enkaso tinamaan nin ASF an saindang mga orig.
Sa ngunian bako na 5,000 pesos an itatao kan ahensya kundi igwa naman suboot na 4,000, 8,000 asin 12,000 pesos para sa kada payo kan mga inahin kun makasabay ini sa depopulation.
