LEGAZPI CITY-Sa ikatolong pagkakataon ngonian na semana, inatake kan mga pwersa kan Ukraine an Crimean Bridge, segun sa sarong opisyal kan Russia.
Kinumpirma ini kan Moscow-installed Crimea governor Sergei Aksyonov, kun sain pansamantalang ipinasuspinde kaini an trapiko sa nasabing tulay.
An Crimean Bridge iyo an solamenteng koneksyon kan Taman Peninsula kan Russia asin Crimea—sarong teritoryo na sinakop kan mga pwersa kan Russia kan 2014.
Antes kaini, an mga awtoridad kan Russia, nagreport na nin duwang iba pang pag’atake sa tulay, na nagresulta sa pagkarumpag kan sarong seksyon kan estruktura sa katubigan kan Kerch Strait.
An tulay haloy nang nagin pangenot na target para sa Ukraine, huli sa politikal na kahulugan kaini sa Moscow asin sa estratehikong halaga kaini sa pag-ulang sa mga kakayahan militar kan Russia.
An mga pag’atake na ini, nangyari mantang an Presidente kan Russia na si Vladimir Putin nakikipag-ulay ki US President Donald Trump asin ki Chinese President Xi Jinping ngonian na Huwebes, kasabay kan ika-33 na Asia-Pacific Economic Cooperation (APEC) Economic Leaders’ Meeting sa Shenzhen, China.










