LEGAZPI CITY — (Update) Tiwala an Commission on Elections (COMELEC) na well-oriented na an Philippine Drug Enforcement Agency (PDEA) asin Department of Interior and Local Government (DILG) sa mga kakabit na konsekwensya kan pagluluwas kan barangay level narco-list.
Nagtutubod si Regional Elections Supervisor Atty. Maria Juana Valeza na aram kan mga nasabing ahensya an gabat kan responsibilidad sa dapat na gibuhon sa nasabing listahan susog sa nagin intrevista kan Bombo Radyo Legazpi.
Katakod kaini, segun pa ki Valeza na nakaantabay sana man an COMELEC sa mga reklamong posibleng isunad kan mga apektadong indibidwal urog na kun imbwelto an mga madalagan na opisyal.
Nakakaag kaya sa regulasyon kan nasabing ahensya na pwedeng madiskwalipika an sarong kandidato sa pirilian en kaso ma-convict sa kasong kinakahampang.
Dugang pang malaog man sana sa istorya an COMELEC para sa imbestigasyon kun may pormal nang reklamo na ipigsunad.
Magigirumduman na Bicol an may pinakahalangkaw na numero kan mga barangay officials sa narco-list mientras na labi sa 500 man an nasa drug watchlist kan pulisya an nagdadalagan sa presente sa barangay asin Sangguniang Kabataan (SK) elections.
