LEGAZPI CITY – Ipighayag kan Commission on Elections (Comelec) na wara pa sindang nareresibeng kasuguan hali sa main office mapadapit sa planong liwat na pag-octaba kan SK asin barangay elections.
Sa intrevista kan Bombo Radyo Legazpi ki Atty. Maria Juana Valeza, Regional Director kan Comelec Regional Office 5, sienerto kaini na magpapadagos man giraray an saindang registration asin preparasyon sagkod sa wara pang ley na nagtataram dapit sa pag-octaba kan eleksyon.
Mientrastanto, ipighayag man kan opisyal na nagpuon na an saindang bidding asin dapat na mabakal na an mga kinakaipuhan na kagamitan para sa aktibidad kun kaya dapat ngunyan na Hulyo maisapinal na suboot kun malalawos o dae an nasambitan na pirilian.
Segun ki Valeza, kun hasta sa Hulyo dae pa mai-anunsyar an totoong na plano, magkakaigwa nin dakulang problema huli ta kaipuhan na maipadara an mga dokumento asin form para sa bidding asin kun dae, masasayang sana an kwarta kan gobyerno.
