LEGAZPI CITY-Posibleng inabswelto na kan Comission on Elections an imbestigasyon sa pigsasagibing campaign finance violations ni Sen. Rodante Marcoleta katakod kan isyu sa saiyang Statement of Assets, Liabilities, and Net Worth (SALN) asin gastos kan nakalihis na eleksyon, kaibanan an dating mambabatas na si Mike Defensor.
Sa sarong resolusyon kan En Banc na may petsang Marso 18, pinakusog kan poll body an mga rekomendasyon kan saindang Political Finance and Affairs Department (PFAD) na pugulan an saindang fact-finding investigation laban sa senador.
Nagpoon an imbestigasyon huli sa pag-ako mismo ni Marcoleta sa sarong programa sa telebisyon, kun saen sinabi niya an discrepancy sa likod kan saiyang SALN asin kan saiyang gastos sa eleksyon na pigsabing nakaresibe siya nin P75 milyon na kontribusyon hale sa mga amigo.
Kalaunan, inako ni Marcoleta sa sarong verified position paper na dai niya pigdeklara an mga kantidad na ini sa saiyang Statement of Contributions and Expenditures (SOCE) huli ta hinagad kan mga donors an anonymity.
Sinabi pa niya na huli ta naresibe an pondo sarong bulan bago an opisyal na panahon kan kampanya, nagin “personal funds” suboot ini sa irarom kan Peñera doctrine, na nagsasabi na an sarong tawo pigkokonsiderar sana na kandidato sa pagpoon kan panahon nin kampanya.
Nabanggit man kan COMELEC Political Finance and Affairs Department na bigo si Marcoleta na magsunod sa Section 109 of the Omnibus Election Code (OEC) mapadapit sa detalyadong report kan mga kontribusyon, alagad piglinaw na bako na bako na ini pagbalgar sa eleksiyon.
