LEGAZPI CITY-Ipighayag kan sarong enivironmental advocate na dapat nang ma-regulate o ipagbawal na sa nacion an Colored Bomb Smoke na ginamit asin nakadistroso sa mga estudyante sa Bicol University durante kan ipigsasagibong taunang BU Hataw.
Segun ki Ban Toxic Campaigner Thony Dizon, sa intrevista kan Bombo Radyo Legazpi na pig-categorize niya bilang public concern an ginamit na produkto huli sa naapektaran asin nadifisilan maghangos an mga estudyante.
Wara pa man suboot na pagbusisi mapadapit sa ginamit na Colored Bomb Smoke asin sa ngonian an nagsasagibo na nin lakdang an Department of Health asin Philippine National Police ngani hilingon an epekto kan nasabing produkto.
Dugang pa ni Dizon na posibleng delikado an content o ingredient na ginamit kun kaya dapat siertuhon na an pag-regulate kaini sa nacion.
Pigrepaso na man suboot kun kairiba an nasabing produkto sa pyrotechnics basado sa Republic Act No. 7183 o an Firecrackers Law.
Wara pa man suboot na ipigpaluwas na abiso an Food and Drug Administration (FDA) manungod digdi.
Ipigdoon man niya na dapat magserbi ining warning sa mga jovenes asin organizers kan mga aktibidad.
Kaipuhan man suboot an pagbusisi sa mga Colored Bomb Smoke ngani maaraman kun anong klaseng kemikal an ginamit digdi.
Enkaso suboot na magin kategorya bilang pyrotechnics an nasabing produkto an pwedisir na ining ma-regulate sa nacion.
Dagdag pa ni Dizon na malinaw na delikado asin nakakapinsala an produkto sa salud kan mga jovenes kun kaya importante suboot na matawanan ini nin pansin asin tuluyang ipagbawal.
Abiso man niya na dapat bantayan asin magsagibo nin paagi ngani na an mga gagamiton kan mga estudyante asin organizers an dapat na nag-cocomply sa mga regular na produkto sa nacion asin mas epektibo suboot na maggamit na sana nin mga natural na pamamaraan sa pagkondusir nin sarong aktibidad.
