LEGAZPI CITY — Welcome sa pamilya Batocabe an mga panibagong development sa kaso kan pagadan ki Ako Bicol Partylist Rep. Rodel Batocabe.
Sa intrevista kan Bombo Radyo Legazpi ki Atty. Justin Batocabe, matuang aki kan ginadan na kongresista, kinumpirmar kaini na igwang panibagong kasong isinunad sa ipigtutukdong ‘mastermind’ sa pagadan sa ama na si Daraga Mayor Carlwyn Baldo.
Ini an afuera pa sa kasong double murder asin six counts nin frustrated homicide na enot nang isinunad kan Philippine National Police.
Segun digdi, nagsunad na man an Criminal Investigation and Detection Group (CIDG) sa Sandiganbayan nin kasong Graft and Corruption kontra sa alkalde huli sa suboot pag-hire nin mga ghost employees.
Marurumduman na enot nang inako kan mga suspek sa pagadan ki Cong. Batocabe na kaibanan sinda sa payroll kan lokal na gobierno kan Daraga.
Mientras tanto, bilang abogado, nasasabutan suboot kan joven na Batocabe na halawig na proseso an kinakaipuhan para sa pagbaba kan resolusyon katakod kan nasambitan na kaso kata inenganyar kaini an piskalya na dae maghidali ngani na ma-imbestigaran nin marhay an mga kapot na ebidensya.
