Naglunsar an China asin Russia nin joint naval drills sa hampang kan lalong naglalalang tensyon sa Asya asin Europa.
Inilunsar kan duwang higanteng nasyun an joint exercise sa military port sa Guangdong province.
Sentro kan aktibidad an anti-missile exercises, sea strikes asin air defense mantang nagsaggibo man nin on-map military simulation asin tactical coordination exercises.
Magdudurar an drills nin hasta sa katahawan kan bulan nin Hulyo.
Enot naman na sinabi kan China na obheto sana kan aktibidad na mapakusog an koordinasyon kan duwang nasyun ngani na mapangatamanan an seguridad asin katoninongan.
Lalong naglalala an tensyon ngunyan sa Asya huli sa agawan nin teritoryo sa West Philippine Sea, iwal kan China asin Taiwan siring man an tensyon sa pagultangan kan South Korea asin North Korea.
Sa Europa, tensyonado naman an Poland asin Belarus mantang padagos pa an gera kan Russia asin Ukraine.
Naenot naman na naglunsar nin joint military drill an China kaiba an Belarus harani sa border mismo kan Poland.
