Pinahewas an nag-iiral na ceasefire sa bilog na rehiyon kan Kherson sa southern Ukraine nganing maghatod nin pagkakan asin bulong sa ciudad kan Oleshky na presenteng nasa irarom kan kontrol kan Russian forces.
Pigkarkulong 2,000 na residente an nakakulong sa nasabing ciudad nin warang suplay nin kuryente, tubig, pagkaon makalihis maraot an Kakhovka Dam kan 2023 asin mapalibutman kan mga landmine an gabos nin agihan.
Isinagibo an pagpapahewas kan kasunduan sa paagi ninda US First Lady Melania Trump asin Pope Leo XIV nganing matawan nin safe passage sa mga humanitarian convoy hasta sa Nobyembre 1.
Ipighayag kan magkabilang panig na pigsusunod an kasunduan, kun sain inapod ini ni David Arakhamia hale sa parlamento kan Ukraine na pinakadakulang de-escalation sa giyera puon kan taong 2022.
Nagpuon na an engineering reconnaissance asin paghali kan mga explosive device kan mga militar nganing maihatod an mga tabang sa Huwebes asin maisagibo ang pormal na evacuation sa Biyernes.
Mientrastanto, nagpatanid si Ukrainian President Volodymyr Zelensky mapadapit sa seguridad kan mga namamanwaan mantang padagos na kinukumpuni ang mga ruta kun sain naraot man an mga tulay sa kahalabaan kan Dnipro River.
