LEGAZPI CITY – Dae nagpahuri sa pagkokundusir nin outreach program an glam team ni Miss Universe 2018 Catriona Magnayon Gray na personal nagpasiring sa provincia kan ALbay ngani na magbarewas nin tabang sa mga evacuees sa banwaan kan TIwi na naapektaran kan Tropical Depression Usman.
Sa eksklusibong intrevista kan Bombo Radyo Legazpi kay Jojo Bragais, an shoe designer ni Catriona na tubong Albay man, limang taon na suboot nindang pigigibo an pagtabang samga nangangaipo sa manlain lain na parte kan nacion.
Pag-istorya pa kaini na nagsagibo sinda nin sale for a cause kan mga gibo niyang sapatos kun sain 10% kan ganansya an ipigtagama para sa nasambitan na programa.
Dugang pa ni Bragais na todo paghagad nin dispensa an Bicolana beauty huli ta wara ini sa nacion ngani na personal na mag-atendir sa outreach program alagad dakula an nagin tabang kaini huli sa pagheras sa social media account kaini nin impormasyon, kaya mas dakol na tawo an nagin interesado sa saiyang mga sapatos.
Huli suboot sa ginibong ini ni Catriona, nakapabakal sinda nin labi sa 500,000 na pades nin sapatos sa laog nin sarong semana na dakulang tabang para sa mga biktima kan nasambitan na raot kan panahon.
Afuera ki Bragais, nag-atendir man sa aktibidad an hair stylist kan Bicolana beauty na si Justine Aliman, official Videographer na si Jolo Luarca, Bb. Pilipinas 2016 1st runner up Angelica Alita asin dakol pang iba.
Mientras tanto, padagos man suboot ngunyan an paghahanap kan team nin mga day care centers na pwedesir na ipa-renovate urog pang dakula an pagsuporta ni Catriona sa edukasyon kan mga jovenes.
