LEGAZPI CITY- Nagpahayag nin kahandaan an Bureau of Fire Protection sa pagtatao nin asistensya sa mga atleta sa Private Schools Athletic Association.
Segun ki Senior Fire Office 3 Madonna Rempillo sa intrevista kan Bombo Radyo Legazpi na na-inspeksyon na an nasa 13 billeting areas sa ciudad, urog pang igwa ng mga nag-abot na deligado hali sa ibang mga rehiyon.
An nasabing ahensya man an namamayo sa pag-inspeksyon kan bastanteng suplay nin tubig ngani na magin kumportable an mga atleta.
Paliwanag kan opisyal na sa presente igwa ng incident management team, kaya napaghandaan na an posibleng mga problema na pwedesir na kahampangon sa nasabing aktibidad.
Napag-araman na nakipag koordinar naman sa pamayuhan kan Legazpi City Water District ngani na masierto an matapos na supply kan tubig.
Ini urog pang pigkakarkulong nasa poco mas o menos 10,000 an pinaglalaoman na mga partisipantes.
Dugang pa ni Rempillo na igwa man na medical team an Legazpi City Fire Station ngani na i-augment sa bilog na durasyon kan Private Schools Athletic Association.
Ngunyan na aldaw, pinaglalaoman na madudugangan pa an mga deligado na maabot sa ciudad bilang preparasyon sa aktibidad.
Mientras tanto, nangapudan man an opisyal nin kooperasyon ngani na masierto an seguridad kan mga partisipantes.
