Magbabalik Pinas an main dancer asin lead rapper kan sikat na South Korean boy band na BTS na si Jung Ho-seok o mas midbid sa saiyang stage name na J-Hope para sa saiyang pinak-enot na upcoming solo concert tour.
Inanunsiyar kan Korean superstar sa saiyang Instagram post an mga nacion na kaiba sa saiyang solo tour na inapod na “Hope on the Stage” na mapoon sa 3 back-to-back shows poon February 28 hasta March 2 sa Seoul.
Susunodan ini kan saiyang concert tour sa iba pang cities sa US asin Asia kabale na an Manila.
An Asian leg tour kan Korean rapper sa Manila an gigibuhon sa SM Mall of Asia Arena sa April 12 asin 13 , sunod sa Saitama, Singapore, Jakarta, Bangkok, Macau, Taipei asin Osaka.
Ini an enot na pagkakataon na mabalik an sarong BTS member sa nacion kasunod kan “Wings” concert kan BTS kan 2017 na isinagibo man sa MOA Arena.
Sa presente, dae pa pigpapaluwas an detalye para sa ticket price sa pigkakasabikan kan mga Army na concert tour.
