LEGAZPI CITY – Inuran nin pagbati an Gilas Pilipinas makalihis na magkwalipika sa semis kan Olympic Qualifying Tournament sa ibong kan pagkadaog kontra sa Georgia.
Sa nasabing kawat, dae man nakasalbar sa mata kan basketball fans an suboot pagbalo kan Georgia na magkaigwa nin overtime sa paagi kan pagpapalaog kan bola sa ring kan Gilas makalihis an free throw ni Chris Newsome sa huring segundo kan kawat.
Segun ki International Referee Bong Pascual sa intrevista kan Bombo Radyo Legazpi na sa FIBA rules, kun mapapatunayan na intentional an pagpapalaog sa basket kan kalaban, dae man ini aakuon na counted.
Alagad posibleng mapatawan nin technical foul an siisay man na mapapatunayan na imbwelto sa intentional shooting sa ring kan kalaban.
Huli digdi, imposible man liwat na magkaigwa nin overtime game ngani sanang magkaigwa pa nin tsansa an Georgia sa saindang kampanya.
Mientras tanto, aminado si Pasual na an masunod na laban kan Gilas kontra sa Brazil an mas magigin magabat pa.
Huli huli ta nagkapirang mga NBA players an nasa koponan asin bisto man an Brazil na pirmihan na nagka-kwalipika sa Olympics.
Kinakaipuhan suboot na pakusugon pa kan Pilipinas an pag-connect kan saindang outside shooting asin gabos na players an mag-convert nin score ngani na magkaigwa nin tsansa kontra sa Brazil.
