LEGAZPI CITY- Ipighayag ni Camarines Sur 3rd District Rep. Gabby Bordado Jr. na panahon na nganing magmove an kampo ni dating Senador Bongbong Marcos makalihis na ibasura na kan Supreme Court an isinangat na electoral protest kontra kay Bise Presidente Leni Robredo.
Ngunyan na semana kan ihayag kan SC na nagserbing Presidential Electoral Tribunal (PET) na wara nin merito an petisyon ni Marcos asin dae man ki nahiling na dayaan sa pagkadaog kaini kay Robredo sa nakalihis na 2016 national elections.
Sa intrevista kan Bombo Radyo Legazpi kay Bordado na saro sa mga masugid na tagasuporta ni Robredo, ipigpapasalamat kaining makalihis an limang taon nakapagpaluwas na nin kasimbagan an SC sa petisyon nganing matuldokan na an mga alegasyon nin dayaan.
Mas makakamaray suboot sa lado ni Marcos na magtutok na sana sa masunod na eleksyon sa 2022 o maggibo na sana nin ibang bagay kesa sa ibusol pa an petisyon.
Pigheras man ni Bordado na pighahalat niya an pag-uli ni Robredo sa Naga ngani na personal na itao an mensahe nin pagcongratulate digdi.
