LEGAZPI CITY—Ipig-orgulyo kan manhamiento kan Bicol University makalihis na irepresentar kaini an Bicol Region asin makaguno nin bulawang medalya sa Philippine Accrediting Association of Schools, Colleges and Universities National Culture and the Arts Festival 2026 na ginibo sa Iloilo City.
Segun ki Bicol University College of Arts and Letters Faculty Member Prof. Jobert Landeza, sa intrevista kan Bombo Radyo Legazpi, an saindang palabas na may titulong ‘Trip to Buwan’ para sa Short and Sweet Play (Musical) an naglaladawan mapadapit sa sarong joven na pangaran na Boyboy na nangingiturugan na magin sarong astronaut nganing mahiling an saiyang ama sa bulan.
Segun saiya na nagtutukar ini mapadapit sa ‘broken family’ asin kun pano ini maipapaliwanag sa mga kajovenesan.
Nagpartisipar sa nasabing aktibidad an mga estudyante gikan sa Bachelor of Performing Arts-Theater kan BU College of Arts and Letters.
Dugang kaini na nagpuon sinda na magpreparar amay pa kan bulan kan Enero kun sain nagkaigwa nin screening, script para sa kompetisyon, audition para sa mga mawot na mag-intra digdi.
Sinabi man ni Landeza na an saindang palabas an may hugot sa personal na eksperyensya kun sain siya an naghahanap nin pagpadangat sa ama, kaya ginamit niya an nasabing play ngani iheras an kadifisilan kan nasa sarong broken family.
Iniladawan man niya na saro ining ‘magical’ huli sa durante kan saindang performance an pagbabalik man kan Artemis II gikan sa bulan para sa lunar flyby mission.
Tinawan-doon man kan propesor na an saindng pinaka-goal sa pagtanghal an mapahiling an pag-appreciar sa sining kan mga state universities kan nacion, magheras nin istorya sa ibang tawo, asin bonus an naresibe nindang medalya.
