LEGAZPI CITY – Gadan an sarong 9 months old na omboy makalihis na mahulog sa bangin an pigsasakayan kaining tricycle sa Barangay Busay, Magallanes, Sorsogon.
Segun ki Bulan Municipal Disaster Risk Reduction and Management Office Broadcast Staff Franz Dela Cruz sa intrevista kan Bombo Radyo Legazpi na pasiring kuta sa banwaan kan Magallanes an sarong magkakamag-anak na mga residente kan Bulan nganing magkarigus sa sarong resort.
Basado man sa saindang pakikipag-olay sa tricycle driver na overloaded ini kun kaya pinababa muna kaini an mga pasahero mantang pigbabaybay an pababang parte kan tinampo.
Alagad dae suboot namalayan kaini na nagsakay palan liwat an mga pasahero sa likudang parte kan tricycle mantang pababa ini na nagkawsa kan pagkawara kan balanse asin kontrol na nagresulta sa pagkahulog sa bangin.
Segun pa sa opisyal na tulos man sindang nagresponde asin isinugod sa Bulan Medicare Hospital an iba pang sakay kabale an driver nganing matawan nin medikal na atensyon alagad idineklarang dead on arrival na an omboy.
Sa saiya man na pakikipag-olay sa ina kan omboy, napag-araman na nadaganan kan traysikel an aki kan mahulog ini sa bangin kun kaya nagsapo ini nin mga head contusion asin multiple abrasions na pwedesir suboot na ikinagadan kaini.
Paglilinaw niya man na sinda an nakaresponde huli ta sinda an harani sa pinangyarihan kan insidente asin parte pa suboot kan saindang banwaan an naunambitang lugar.
Pagirumdom man ni Dela Cruz sa mga ma-outing na syertuhon na nasa maray na kamugtakan an saindang mga behikulo, mag-ingat sa pagmamaneho urog na kun may sakay an mga ini na omboy nganing malikayan an kaparehong insidente.
