LEGAZPI CITY – Ipighayag ni Ako Bicol Rep. Alfredo Garbin Jr. na nakikipagkoordinar siya sa pamilya kan puganteng dating kongresista na si Elizaldy Zaldy Co.
Ini an makalihis na inanunsyar kan nakaaging aldaw ni Presidente Bongbong Marcos na dagos nang natapos an pagtatago kan naunambitang dating mambabatas pagkatapos maarestar kan mga otoridad sa Czech Republic.
Sa intrevista kan Bombo Radyo Legazpi ki Garbin, sinabi kaini na sagkod ngonian an wara pa siyang nareresibing impormasyon gikan sa pamilya mapadapit sa kamugtakan asin status ni Co.
Dakol suboot na impormasyon an dapat ilahad ni Co, urog na kun matatawan ini nin tamang due process sa irarom kan ley.
Naglalaom man siya na makakataram asin makakapagbuyagyag nin impormasyon an dating mambabatas mapadapit sa maanomalyang flood control projects nin malaya sa ibong kan mga nag-iiral na tensyon sa politika.
Segun pa ki Garbin na mawot niyang maka-olay an pamilya ni Co nganing aramon an konkretong impormasyon kun nadakop ini, kun nakakulong, kun gagamiton an gabos na paagi nganing dae makauli, o ilalaban niya ini sa hampang kan ley.
Alagad syerto suboot siya na papatunayan ni Co an saiyang isiniwalat sa mga video na saiyang pinaluwas kan mga nakaagi.
Naglalaom man si Garbin na maitatao kan Gobierno kay Zaldy Co an gabos na magkakanigong seguridad nganing maka-atendir sa gabos na legal proceeding asin maibuyagyag an katotoohan.
