LEGAZPI CITY – Ikaduwa an Bicol sa mga rehiyon sa Pilipinas na nakapagrehistro kan pinakahalangkaw na unemployment rate kan Enero 2021.
Buminadol ini sa 11.3% na nangangahulugang nasa 262, 415 sa labor force na edad 15-anyos pataas na warang trabaho puon sa 5.5% kan 2020, segun sa Philippine Statistics Authority (PSA).
Paliwanag ni PSA Bicol Regional Director Cynthia Perdiz, pighihiling na dakulang factor digdi an pandemya asin serye kan mga bagyo na nag-agi asin nagrapado sa rehiyon.
Labing naapektaran an service workers sa pagpundo kan transportasyon pasiring Manila maging an pagluwas kan mga agriculture products hali sa Bicol pasiring sa ibang rehiyon.
Ikinaalarma man ni Perdiz an sitwasyon lalo pang kakabit kaini buminagsak man an employment rate sa 88.7% hali sa 94.5% kan nakalihis na taon.
Bahagya man na nagbaba an underemployment o mga may trabaho na nagmamawot nin dugang na oras ngani na maganansya hali sa 29.1% kan 2020, nagin 25% sa presente.
Mientras tanto, CALABARZON an may pinakahalangkaw na unemployment rate sa nasyon sa 13.1%.
