LEGAZPI CITY-Nakapagrehistro nin sumatotal 15 responses an Bureau of Fire Protection Albay sa mga sementeryo kasunod kan selebrasyon kan Undas ngonian na taon.
Segun ki Bureau of Fire Protection Albay Provincial Fire Marshall Fire Superintendent Jerickson Miraflor, sa intrevista kan Bombo Radyo Legazpi, na sa saindang pagrespondi igwang mga indibidwal an pigluya, nadifisilan sa paghangos asin mga nauntog na nagsapo nin mga minor abrasion sa saindang kamot asin bitis.
Tulos man na suboot na nirespondigan kan saindang mga personahes asin idinara an mga pasyente sa pinakaharaning pasilidad.
Kadaklan suboot sa mga narespondihan sa mga kamposanto, an mga indibiwal na nalibong huli man sa init kan panahon.
May 3 insidente man an narespondihan sa Daraga, 1 sa Legazpi asin may mga isinugod man sa ospital sa Tabaco City basado sa datos kan saindang ahensya.
Naka-patrolya man suboot an saindang ambulansya sa mga sementeryo huli sa posibleng madagdagan pa ini sa mga masunod na aldaw.
Abiso kan opisyal sa mga mabisita pa sa mga sementeryo na ibitaran an mga matawong lugar huli sa ini an kadalasang nagkakawsa nin posibleng mga insidente.
