LEGAZPI CITY – Nagpagirumdom an Bureau of Fire Protection sa mga establisyemento asin publiko mapadapit sa salbadong pagseselebrar nin Valentine’s day.
Segun ki Bureau of Fire Protection Albay Provincial Fire Marshall Fire Superintendent Jerickson Miraflor sa intrevista kan Bombo Radyo Legazpi na dapat syertuhon kan mga establisyemento an saindang fire safety arug kan pagkakaigwa nin fire exit asin fire protection appliances.
Katuyuhan suboot kaini na malikayan an aksidente enkaso may mangyaring dae piglalaoman na pangyayari arug na sana kan kasulo.
Punto pa niya na sa ibong kan nagigin romantic an paggamit nin kandila sa mga couple dates, kaipuhan pa man liwat an pag-iingat huli ta saro ini sa komon na rason kan pagkakaigwa nin kasulo sa mga lugar.
Pigtaram pa kan opisyal na basado man sa saindang datos kan mga nakaaging taon, wara pa sindang nairerehistrong kasulo na may kinaaraman sa pagseselebrar nin Valentine’s day kun kaya naglalaom sinda na magpapadagos ini ngonian na taon.
Afuera suboot sa pagbabantay an nagtao man sinda nin mga rosas sa publiko nganing maipamate an saindang presensya ngonian na aldaw nin mga puso mantang may mga nagsagibo man nin tree planting na pagpapahiling man kan saindang pagkamoot sa kapalibutan.
Pagsyerto niya man na permihang nakabantay asin nakahanda an saindang ofisina sa maski anong selebrasyon nganing magtaong tabang sa mga nangangaipuhan.
Pagdoon man ni Miraflor na an fire safety an bako sana obligasyon kan Bureau of Fire Protection kundi obligasyon ini kan gabos nganing magin ligtas an komunidad sa huma kan kasulo.
