LEGAZPI CITY- Kinontra kan Bureau of Fisheries and Aquatic Resources (BFAR) Bicol an plano kan Philippine Coast Guard (PCG) na isabay an mga parasira sa auxiliary team na magpapatrolya sa kadagatan kontra sa iligal na droga.
Sa intrevista kan Bombo Radyo Legazpi ki Nonie Enolva, tagapagtaram kan BFAR Bicol, trabaho kan parasira na magdakop nin mga lamang dagat asin makapag-uli nin makakaon sa saindang pamilya.
Segun ki Enolva, wara man nin ley na nag-oobligar sa mga parasira na magbantay sa kadagatan nganing mapugulan an paglaog kan iligal na droga.
Ipigduon pa kan opisyal na yaon man an mga Philippine Navy, PNP asin PCG ngani na magbantay sa kadagatan asin mas may poder na magpundo sa mga kalakaran nin iligal na droga.
Nagluwas an suhestiyon makalihis an magkakasunod na pagkakarekober nin bloke nin cocaine sa mga kadagatan sa rehiyon na komon na nakukua kan mga parasira.
