LEGAZPI CITY – Aminado an alkalde kan Batuan, Masbate na makusog an nagin epekto sainda kan pangrarapado ni Bagyong Opong.
Segun ki Mayor Marco Cam sa intrevista kan Bombo Radyo Legazpi na nadistroso man an sarong simbahan na pigdarahan kan ibang evacuees mantang uminabot na sa labi 3,000 an nagtetenir sa saindang mga evacuation center.
Kadaklan man sa mga kakalsadahan an nagtetenir na not passable huli sa mga nakabalandrang poste, putol na kahoy, nakalaylay na kuryente asin iba pang klase nin mga debree.
Pigheras niya na an makusog na bugso kan paros an labing nakadestroso sa saindang banwaan na napoon kasubagong alas tres nin maagahon kun kaya padagos na an saindang rescue operation sa lugar partikulamente na an mga naka-istar sa coastal barangay.
Pigtaram pa kan opisyal na dae ninda piglalaoman an bugso kan paros na nagtaong pahirap sainda sa pagrescue huli sa mga nagbabagsakan na kahoy kun kaya wara sindang katurog sagkod mag-aga nganing magtaong tabang asin asistensya sa saindang nasasakupan.
Sa ibong kan wara man na nairehistrong casualty an dae man suboot nakaligtas an mga kaharongan na haros natanggalan na nin bubong mantang apektado man an mga bangka kan mga parasisira huli sa bagsik ni bagyong Opong.
Nakapreparar na an 1,000 na Department of Social Welfare and Development food packs asin naggigibo na nin paagi nganing matawan an mga nasa evacuation center asin puga-puga na an rescue operation.
Pangapodan ni Mayor Cam ngonian sa National Government an tabang huli sa labing destroso na ipigkawsa sa saindang lugar ni Severe Tropical Storm Opong.
