LEGAZPI CITY- Padagos an paghahatod kan gobierno provincial kan Albay nin tabang sa mga paraoma na naapektaran kan aktibidad kan bulkang Mayon.
Segun ki Albay Provincial Agriculture Office Head Daryll John Buenconsejo sa intrevista kan Bombo Radyo Legazpi na nakikipag koordinar sinda sa manlain lain na mga ahensya de gobierno siring kan Department of Social Welfare and Development (DSWD).
Katunayan nanao suboot nin 10 kilo na bagas ngunyan na aldaw para sa mga paraoma na apektado kan nakalihis na ashfall.
Kaibanan sa mga benepisyaryo an mga paraoma sa mga banwaan kan Daraga, Camalig, asin Guinobatan.
Napag-araman na igwa man na nakatalaan na cash assistance para sa mga ini, alagad dae pa naisasapinal.
Sinabi man ni Buenconsejo na dakulang tabang an pagsasairarom sa state of calamity sa nagkapirang mga apektadong lokal na gobierno ngani na marikas na maitao an pangangaipo kan mga apektadong paraoma.
Mientras tanto, nakakatabang man suboot an mga pag-uran ngunyan ngani na mahugasan an abo na nagpatos sa mga pananom na gulay asin prutas.
