Naglilibot pa sa ngonian an mga disaster management officials sa Batanes tangarig na mag-inspeksyon kun nagdara nin danyos an tuminamang Magnitude 6.0 na linog alas-12:44 kasubagong maagahon sa kasagsagan na gayo kan Sabado de Gloria.
Nasa Magnitude 6.2 an nasabing linog sa enot na impormasyon na ipinaluwas kan Philippine Institute of Volcanology and Seismology (Phivolcs) asin may rarom na 157 kilometro.
Segun ki Batanes Governor Marilou Cayco sa sarong intrevista, sa ngonyan warang naresibeng report nin danyos sa propriedades o mga nairido sa nasabing paglinog.
Susog sa mga inisyal na report, accessible asin passable man an gabos na mga tinampo asin tulay mientras na padagos pa an pag-inspeksyon.
Namatian man an pagyugo sa Intensity IV sa Basco asin Itbayat; Intensity III sa Tuguegarao City, Cagayan asin Luna, Apayao mientras na Intensity II sa Laoag City asin Pasuquin, Ilocos Norte, asin Intensity I sa Vigan City.
Hulyo kan nakaaging taon kan tuminama an Magnitude 5.4 na linog sa Batanes na ikinagadan kan walong katawo asin ikinairido kan 63 na iba pa.
Afuera sa linog sa Batanes, tinanyog man nin linog an 141 kilometro, sur-sirangan kan Jose Abad Santos, Davao Occidental bandang alas-2:45 kasubagong aga na may rarom na 52 kilometro.
Namatian an Intensity II sa Kiamba, Alabel asin Malungon, Sarangani mantang Intensity I sa General Santos City asin Tupi, South Cotabato; Gingoog City, Misamis Oriental.
Nagpatanid an Phivolcs sa posibleng aftershocks kasunod kan mga nasabing pagyugo.
