LEGAZPI CITY – Nagpatanid an Albay Power and Energy Corp. (APEC) sa publiko na mag-ingat sa mga “bogus employees” na nagpapabistong konektado sa power firm.
Susog sa ipinaluwas na abiso kan kumpanyang nagsusuplay nin kuryente sa provincia,
Nag-oofrecir an mga ini na magkonektar kan linya nin kuryente karibay an kantidad na P1, 500 para sa servicio.
Tipikal na target kan mga “bogus employees” an mga consumidores na warang guranong pakaaram sa proseso kan pagpapakabit nin linya nin kuryente asin an mga naghihidali na makapatakod na kan servicio sa elektrisidad.
Piglinaw kan APEC na warang empleyado o lineman an pig-otorisa na magsagibo nin direktang transaksyon asin magresibe nin direktang bayad sa mga consumidores na mawot na magpakabit nin linya.
Nagtutubod pa an korporasyon na posibleng parte an mga ini kan sindikatong aktibong nag-ooperar sa Albay kaya hagad an kooperasyon kan publiko na tulos na ipagtaong-aram kun may mga siring na persona na nagtatao nin servicio na arog kan nasambit.
Igwa naman na duwang lalaki an naaprehender kan mga opisyales kan Barangy Puro sa ciudad kan Legazpi kan Agosto 21 makalihis na magpabistong linemen kan nasabing kumpanya.
Susunadan an mga ini nin kasong usurpation of authority, robbery asin extortion kun sain saro an napag-araman na haling Casiguran, Sorsogon asin saro an taga-Barangay Taysan.
