LEGAZPI CITY — Ipapautob suboot kan Legazpi City Police an pagbabawal sa vandalism oras na maisapubliko ini.
Inaprubaran na kaya kan Sangguniang Panglungsod an huring pagbasa kan Anti-Vandalism Ordinance sa syudad na iprinopuesto ni Coun. Jaime Andes.
Segun man ki PSupt. Nilo Berdin, hepe kan Legazpi PNP, mas maray na igwa kan nasabing ordinansa huli sa may magiging basehan na an tawo kun tama o sala an saindang mga piggigibo.
Sinabi pa kan hepe na bako man masyadong magabat an vandalism sa syudad huli sa bako man purupirmi na may naggigibo kaini urog na suboot ngunyan na maaram na an mga residente asin tulos na ipigre-report sa mga otoridad an mga pagbalgar sa ley.
An sisay man suboot na madakop na magbalgar an aarestaron ninda huli sa sarong criminal offense an pagbalgar kan ley.
Dugang pa kan hepe na madadakop man liwat ninda an mga mabalgar maski na pirmi sindang nakakalusot.
Segun pa ki Berdin, oras na maresibe an kopya kan ordinansa, ieeksplikar niya sa saiyang personahes an mga dapat gibuhon ngane na mapautob nin maray an nasabing ley.
