Umarangkada sa second round kan 2026 Toray Pan Pacific Open ang Filipina tennis star na si Alex Eala makalihis idomina an British wildcard na si Mika Stojsavljevic sa iskor na 6-1, 6-2 sa saindang paghahampang kan Lunes sa Ariake Coliseum sa Tokyo, Japan.
Tulos na nakontrol ni Eala an enot na set makalihis makua an enot na limang games antes nakapuntyos si Stojsavljevic. Siring man dae na nagpatinag si Eala asin dagos na nakua an enot na set, 6-1.
Sa ikaduwang set, liwat nagpahiling nin agresibong kawat si Eala asin nakalamas tulos nin 2-0.
Nagribayan pa nin kapangganahan sa saindang service games an duwa antes liwat na nakalamang si Eala sa paagi kan double break asin dagos na isinara an laban sa iskor na 6-2.
Sa masunod na round, makakahampang ni Eala an Australian tennis player na si Talia Gibson, na ika-38 sa world rankings, makalihis kaining daugon si Daria Kasatkina sa enot na round.
Mientrastanto, dae na makakapartisipar si Eala sa doubles event makalihis umatras an saiyang American partner na si Desirae Krawczyk huli sa problema sa likod.
