LEGAZPI CITY – Ipiglansar kan Albay Schools Division Office an ALBAYanihan para sa Masbate na sarong klase nin donation drive para sa mga eskwelahan asin komunidad na nadanyaran kan pangrarapado ni Bagyong Opong.
Segun ki Albay SDO Senior Education Program Specialist for Social Mobilization and Networking Section, Schools Governance and Operations Divison Maria Eloisa Arrellano sa intrevista kan Bombo Radyo Legazpi na bako ini an enot na bes na piglansar ninda an kaparehong inisyatiba huli ta piggigibo na ninda ini para magin tabang sa mga eskwelahan asin komunidad bako sana sa rehiyon bicol kundi magin sa enterong nacion na naaapektaran ki manlain-laing klase nin kalamidad.
Nahiling ninda sa mga post kan mga paratukdo sa provincia kan Masbate na may mga classroom na labing naapektaran, nawaran nin learning materials asin iba pang danyos na ipigkawsa kan bagyo.
Nangapodan man ini sa mga eskwelahan na suportaran an saindang programa o magsagibo nin kapareho na donation drive nganing matabangan an mga kababayan na nasalanta mantang pwedesir man sinda magresibi nin in-kind donation alagad ipigrerekomenda ninda an non-cash nganing marikas na maipadara sa Masbate.
Piglalaoman kan opisyal na sa paagi kan mga siring kaining inisyatiba an mamatean kan mga paratukdo sa naunambitang provincia na may matabang sainda sa panahon kan kalamidad.
Maski sisay suboot an pwedesir magdulok sa saindang ofisina Deped official man o pribadong indibidwal asin pwede man makipagkoordinar sa saindang mga contact number para sa kadugangang detalye.
Mawot nindang matawan ngonian nin prayoridad an pagpapakarhay nin mga eskwelahan na nadistroso ni Opong arug kan mga construction supplies alagad huli ta may classroom ngonian na dae pa mapakinabangan asin totally damage an eenuton muna ninda an pagkakaigwa nin tent nganing maipagpadagos an pagklase kan mga estudyante.
Pangapodan ni Arellano sa publiko na may marhay na boot na dae magduwang isip na magtabang para sa mga Masbateñong estudyante na naapektaran kan bagyong Opong asin tawan nin paglaom na makakabuwat sinda sa naeksperyensyahang pagkakadapa.
