LEGAZPI CITY — Hinagad ni Albay Rep. Fernando Gonzalez sa mga siyentista urog na sa mga geologists na pag-adalan an duwang famosong ecological tourism destinations sa syudad kan Ligao.
Segun sa opisyal, an pag-aram sa historya kan Kawa-Kawa Hill asin Batong Languyon an makakatabang ngani na matawanan nin giya an mga lokal na opisyal sa saindang tourist promotion campaigns.
Sarong kakaibang formation nin mga bato an Batong Languyon na igwa nin manlaen laen na kadakulaan siring kan mga volcanic debris.
Saro pa sa mga eco-tourism site sa probinsya kan Albay an Kawa-Kawa na sarong bulod na dae nin tuktok na garo sarong kawali an itsura.
Saro ini sa mga paboritong destinasyon kan mga local asin foreign tourists.
Napag-araman na rinibong mga turista an nagpapasiring digdi kada aldaw kun sain presente man an mga imahe kan Station of the Cross.
